ගම්පහ දිස්ත්‍රික් එක්සත් ජනතා නිදහස් සන්ධාන ලයිස්තුවේ වැඩිම මනාප ලබාගත් බස්නාහිර පළාත් මහ ඇමති ප්‍රසන්න රණතුංග මහතාට එරෙහිව අවි අමෝරා ක්‍රියා කිරීමට සන්ධාන ලයිස්තුවේ පරාජයට පත් මන්ත්‍රීවරුන් කිහිපදෙනෙක් කටයුතු කරමින් සිටියි. ඒ අතර ඔහුගේම සොහොයුරු රුවන් රණතුංගද සිටීම විශේෂත්වයකි.
ඊට අමතර පණ්ඩු බණ්ඩාරණායක, ෆීලික්ස් පෙරේරා වැනි ප්‍රබලයින්ද සිය පරාජයට ප්‍රධානතම හේතුව ප්‍රසන්න රණතුංග මහ ඇමතිවරයාගේ ක්‍රියා කලාපය බව ප්‍රසිද්ධියේම විවේචනය කරමින් සිටිති. එහිදී පණ්ඩු බණ්ඩාරණායක මහතා කියා සිටියේ ප්‍රසන්න රණතුංග මහතා සෘජුවම ගම්පහ දිස්ත්‍රික්කය පුරාවටම මහින්ද රාජපක්ෂට හිතවත්යැයි හැඳින්වූ කිහිප දෙනෙක්ට පමණක් ඡන්දය දෙන ලෙස සන්ධාන පාක්ෂිකයන්ට බලපෑම් කිරීම තුලින් තමන්ගේ පරාජය සිදුවූ බවයි.
මෙයට පිළිතුරු ලෙස ප්‍රසන්න රණතුංග මහතා කියා සිටියේ එම චෝදනා සම්පූර්ණයෙන්ම අසත්‍ය බවය. එසේම ගම්පහ දිස්ත්‍රික්කයේ පරාජයට වගකිව යුතු වන්නේ දිස්ත්‍රික් නායකයා බවත්, ඒ වෙනුවෙන් තමන්ට චෝදනා කර පලක් නැති බවයි.
