පසුගිය සතියේ අන්තර්ජාලයේ ශ්‍රී ලාංකිකයන් අතරේ දැඩිසේ හුවමාරුවූ සිදුවීම වූයේ හිරුණිකා ප්‍රේමචන්ද්‍රගේ විවාහය මොහොතේ ලබාගත් ඡායාරූප වලින් ඇය ගැබිණියක් බව පෙන්වා සිදුකල කුණු රස මඩ ව්‍යාපාරයයි. එය බොහෝ දෙනෙක්ගේ දැඩි විවේචනයට සහ හෙලා දැකීමට ලක්වූ සිදුවීමක් වූවත් හිරුණිකාගේ දේශපාලන චරිතය සහ පුද්ගලික චරිතය බිම වට්ටවා කුඩු කිරීමට කැමති අතලොස්සක්වූ මානසික රෝගීන්ට එය අගනා මස් කට්ටක් ලෙස සැලකිය හැකිය. එය ප්‍රචාරණය කල මානසික රෝගීන්ට දිය යුතු පිළිතුර වූයේ තමන්ගේ පෙම්වතියගේ, බිරිඳගේ, සොහොයුරියගේ හෝ මවගේ උදරය දෙස පරික්ෂාවකින් බැලුවහොත් ඇතැම්විට හිරුණිකාගේ මෙන්ම යමක් සොයාගත හැකිවනු ඇති බවයි. බොහෝවිට කාලයක් තිස්සේ ශරීරයේ හැඩය පිළිබඳ නොසලකා සිටින තරුණියන්ගේ වුව උදරය ඉදිරියට පැමිණීව වත්මන් ආහාර රටාවේ සහ අවිවේකයේ ගැටළුවකි. එසේ නොවී හිරුණිකා සත්‍ය ලෙසම ගැබිණියක් වුවත් එය ඔවුන්ට ගැටළුවක් නොවන්නේනම් අන් අයට ඇති ගැටළුව කුමක්ද කියා ප්‍රශ්න කෙරුණි.
ඒ හා සමාන සිදුවීමක් නැවත මතුව ඇත. එනම් හිටපු ජනාධිපති මහින්ද රාජපක්ෂ මහතා හිටපු ටෙස්ට් ක්‍රිකට් නායක හෂාන් තිලකරත්නගේ බිරිඳ අප්සරා හමුවූ මොහොතක ගත් ඡායාරූප කීපයක් ඇය විසින්ගේ ඇගේ ෆේස්බුක් ගිණුමට මුදාහැරීම සහ එහි සාමාන්‍යයෙන් දකිනවාට වඩා මහින්ද රාජපක්ෂ මහතාගේ උදරය සහ ශරීරයේ ස්ථූලතාව කැපී පෙනීම යන සිදුවීමයි. හිරුණිකාගේ බඩ ගැන විස්සෝපවී රළු විවේචන කල ඇතැම් පාර්ශවයන් මහින්ද රාජපක්ෂගේ බඩ සහ මහත අල්ලාගෙන දඟලන බව පෙනෙන්නට ඇත. ඒ අතර මෙරට ප්‍රකට පුවත් වෙබ් අඩවි කීපයක්ම ඇත. එම වෙබ් අඩවිවලට මේ දිනවල ඇති ප්‍රධානතම ඉලක්කය මහින්ද රාජපක්ෂ චරිතයේ ඇති පෞර්ශ්‍යත්වය සහ ආකර්ශණීය බව බිඳ දැමීමය. ඒ සඳහා අදාල ඡායාරූප භාවිතා කරමින් ඔවුන් කටයුතු කරති.
හිරුණිකාගේ කුණු කන්දල් සමහර පිරිස් රස කරද්දී එයට විරුද්ධ වීමටත් මහින්ද රාජපක්ෂගේ කුනු කන්දල් රසකරද්දී එයට එක්වී හුරේ දමමින් රසකිරීමත් තුල ඇත්තේ පුද්ගලානුබද්ධ වෛරයක් මිස සැබෑ ලෙසම මිනිසුන්ගේ කුණු කන්දල් ඇවිස්සීමට එරෙහිව නැගී සිටින ගුණාංගයක් නොවන බව පැහැදිලිය. හිරුණිකා මෙන්ම මහින්ද රාජපක්ෂද දේශපාලන චරිතයක්ය. දෙදෙනා සමගම අපට ඇත්තේ දේශපාලන ගණුදෙනුවක් මිස පුද්ගලික කෝන්තරයක් නොව. එනිසාවෙන් හිරුණිකා සේම මහින්දටද අනවශ්‍ය දේ අල්ලාගෙන ගහනවානම් කට ඇරීම සැබෑ ශ්‍රී ලාංකිකයෙක්ගේ යුතුකමය.
හිරුණිකා දේශපාලනයට නොආවානම්, අභීත ලෙස වේදිකාවල හඬ නොනැගුවානම් හිරුණිකාගේ බඩ පොඩඩක් වැඩියෙන් පෙනීම නොව දරුවෙක් වඩාගෙන විවාහ වුනත් මාධ්‍යයට සහ අවස්ථාවාදී දේශපාලනික කුක්කන්ට එය බුරන්නට හේතුවක් නොවනවා සහතිකය. එසේම මහින්ද රාජපක්ෂ කලක් මුලුල්ලේ ආකර්ශණීය පෞර්ශ්‍යයක් සහිතව වයස 70 ඉක්මවූවද ප්‍රතාපවත්ව නොසිටියානම් හෝ දේශපාලනය නොකරානම් මහින්ද අලියෙක් ගාණට මහත් වුනත් ඉහත කී මාධ්‍ය වලට හෝ කුක්කන්ට එය මස් කටුවක් නොවනවා සහතිකය. ගැටළුව ඇත්තේ පුද්ගලයන් දෙදෙනෙක් සම්බන්ධව පාර්ශව කීපයක් දෙයාකාරයකට කටයුතු කිරීමය.
කාගේ හෝ කුණු ගොඩක් අවුස්සා සතුටු වීම සහ මුදල් ඉපයීම කරනවා වෙනුවට මෙරටට කලයුතු බොහෝ දේ මාධ්‍යයට සහ පුද්ගලයින්ට ඇත. කඩුවක් ඇති රණශූරයෙක්ට කිතිකවා පරාජය කර වැඩක් නැත. කඩුවෙන්නම් කඩුවෙන් සටන් කල යුතුය. එහෙත් මාධ්‍යය පිටුපස සිටින බොහොමයක් කශේරුකා උගසට තබා මුදල් උපයන්නෝය. ඔවුන්ට හිරුනිකාගේ බඩත්, මහින්දගේ බඩත් පමණක් නොව තම බිරිඳගේ, සහෝදරියගේ බඩ පවා මුදල් කල හැක.
0 Comments:
Please leave your comment